Santiago de Compostela foi o escenario do XIV Simposio Internacional de Lipodistrofias, celebrado os pasados 16 e 17 de outubro. O encontro científico congregou a 800 especialistas nacionais e internacionais co obxectivo de compartir os últimos avances no coñecemento destas enfermidades raras e analizar as súas implicacións clínicas, metabólicas e sociais. O simposio combinou investigación básica e clínica coa actualización sobre diagnóstico, clasificación e tratamento das lipodistrofias.
A organización correu a cargo da Asociación de Familiares e Afectados de Lipodistrofias (AELIP) e o grupo de investigación UETeM (Unidade de enfermidades tiroideas e metabólicas) do CiMUS, dirixido por David Araújo Vilar. Durante o evento, entregouse o Premio de Investigación en Lipodistrofias «Celia Carrión Pérez de Tudela» á profesora Giovanna Lattanzi, directora do Consello Nacional de Investigación de Italia, en recoñecemento ao seu impulso á investigación.
“"As lipodistrofias seguen presentando importantes retos no diagnóstico e tratamento, polo que é fundamental impulsar a investigación e reforzar a colaboración entre equipos científicos de distintos países. Este simposio permitiunos coñecer os últimos avances, identificar novas liñas de traballo e achegar o coñecemento científico ás necesidades reais dos pacientes."
A xornada científica do venres incluíu unha conferencia inaugural do profesor Ángel Carracedo sobre o proxecto IMPaCT Genómica e a súa contribución á redución da odisea diagnóstica das enfermidades raras. Abordáronse tamén as lipodistrofias adquiridas, o impacto do almacenamento excesivo de graxa, a saúde ósea e novas estratexias terapéuticas, así como novos subtipos e a proposta de definición e clasificación do consenso EClip.
Investigadores do CiMUS como Rubén Nogueiras, Antía Fernández-Pombo, Teresa Prado-Moraña, Sofía Sánchez-Iglesias e David Araújo-Vilar presentaron as súas contribucións sobre as consecuencias metabólicas e bases biolóxicas da enfermidade. A sesión de tarde actualizou o Rexistro EClip e revisou terapias metabólicas e mecanismos xenéticos e celulares.
A xornada do sábado centrouse na dimensión social e asistencial, con sesións sobre dereitos dos pacientes, apoio psicolóxico e saúde mental. O I Encontro Internacional de Persoas Afectadas por Lipodistrofias permitiu compartir experiencias e boas prácticas de acompañamento.
O CiMUS da Universidade de Santiago de Compostela é un centro de investigación de vangarda en enfermidades crónicas, organizado en programas de Mecanismos Moleculares e Integrativo Traslacional, co obxectivo de transferir coñecemento e innovación. Conta co recoñecemento CIGUS da Xunta de Galicia e a acreditación Unidade de Excelencia María de Maeztu.
