Esta iniciativa, enmarcada no Plan de Sostibilidade Turística, ten como obxectivo principal construír un modelo turístico máis equilibrado e sostible. Para iso, impulsarase a creación de actividades que poñan en valor barrios, rutas naturais, patrimonio, gastronomía, artesanía e cultura viva menos coñecida da cidade.
“"A diversificación turística é unha prioridade irrenunciable para o goberno municipal. O turismo masivo concentrado nun único espazo ten un custo sobre o patrimonio e os veciños do lugar, e un destino sostible é tamén un destino mellor, máis competitivo e máis xusto."
O programa, que é totalmente gratuíto para as empresas participantes, comeza cun diagnóstico das súas capacidades, seguido de cursos de formación en innovación, creación de guións emocionais e comercialización. A consultora adxudicataria do programa, Innotur, destacou a importancia de xerar experiencias con vinculación emocional para que o visitante conecte coa cidade.
Espérase crear 16 novos produtos turísticos baseados en seis eixes temáticos prioritarios: cultural e patrimonial, enogastronomía, turismo creativo, verde, familiar e de incentivos. Estas experiencias deberán incluír, entre outras propostas, visitas guiadas, rutas interpretativas e opcións de aloxamento, ademais dunha oferta específica para o sector MICE (turismo de negocios).
Cada unha das tres administracións implicadas –o Concello, a Xunta de Galicia e o Goberno Central– achega un millón de euros a este proxecto. As autoridades confían en que estas iniciativas amplíen o catálogo de posibilidades turísticas de Santiago e permitan aos visitantes explorar máis aló do centro histórico, consolidando o papel da cidade como referente na promoción turística galega.
