Os galardóns, que se entregarán o 20 de novembro no Hostal dos Reis Católicos, distinguen a persoas e entidades que destacan polo seu labor. Rosa María Crujeiras Casais, a primeira muller reitora na historia da USC, impulsou unha universidade feminista e inclusiva, comprometida coa prevención da violencia machista e a creación da Vicerreitoría de Igualdade e Diversidade.
A distinción recoñece o seu traballo para avanzar cara a unha universidade máis igualitaria, revisando a normativa universitaria e reforzando as medidas preventivas para garantir un entorno académico e laboral seguro para as mulleres.
Noutros ámbitos, tamén foron premiadas a ex congresista Carmen Marón Beltrán, a presidenta da Audiencia Provincial de Lugo, Sandra María Piñeiro Vilas, o Proxecto Vagalume de Santiago, a Asociación Larume Axencia de Igualdade de Ourense e o Colexio Oficial de Farmacéuticos de Pontevedra.
As mencións honoríficas recaeron na Asociación de Mulleres con Discapacidade de Galicia (Acadar), a Policía Local de Rianxo, o Equipo Viogen da Garda Civil de Burela, o xefe da UFAM de Ourense Carlos Vázquez e o Equipo Viogen de Cambados. A distinción especial 'Comunicación en Igualdade' foi para as fundadoras da Asociación de Mulleres Galegas da Comunicación (Mugacom).
