A xornada, que reúne unha trintena de docentes de Infantil, Primaria e Secundaria, busca achegarlles diferentes modelos organizativos, prácticas e estratexias de atención á diversidade, fomentando o intercambio de experiencias para construír contornos educativos máis inclusivos.
O titular do departamento educativo da Xunta puxo en valor o traballo da comunidade educativa, especialmente de docentes e especialistas en atención á diversidade, para estimular o talento e as capacidades de cada estudante. "A vosa presenza nesta xornada formativa e a participación no programa Incluídas é un claro exemplo de que para vós a inclusión educativa é unha prioridade, como o é para a Xunta", sinalou.
Rodríguez engadiu que a igualdade de oportunidades implica ofrecer ao alumnado atención especializada, recursos e itinerarios formativos adaptados, así como alternativas para as familias.
O programa Incluídas, enmárcase na estratexia de internacionalización do ensino a través de Erasmus+, permitindo contrastar o modelo galego de atención á diversidade con outros de Bélxica, Portugal e Francia. A metodoloxía é eminentemente práctica e colaborativa, con traballo en pequenos grupos e rotación por estacións de aprendizaxe.




