A prestixiosa física, profesora na Universidade de Lund (Suecia), participará nunha serie de actividades. O 2 de outubro, ás 19:30 horas, ofrecerá a conferencia titulada ‘O mundo dos átomos á escala de tempo do attosegundo’ no Auditorio ABANCA, unha sesión aberta a toda a cidadanía. Ademais, o xoves 1 de outubro, ás 11:30 horas, terá lugar un encontro cos medios de comunicación no Colexio de San Xerome.
A axenda de L'Huillier en Santiago inclúe tamén unha visita ao Instituto de Materiais da Universidade de Santiago de Compostela (iMATUS) o venres 2 de outubro, ás 11:00 horas. Este encontro, que se desenvolverá nun ambiente informal para coñecer a súa traxectoria, poderá seguirse tamén en liña.
Ao longo da súa carreira, Anne L'Huillier destacou pola súa combinación de coñecemento en física atómica e desenvolvemento de técnicas experimentais de alta precisión. O seu traballo foi fundamental para o avance da óptica non lineal e a ciencia do láser, converténdose en ferramentas esenciais na investigación global. Ademais, formou a varias xeracións de investigadores e impulsou a colaboración científica internacional.
A investigación de L'Huillier permitiu observar procesos naturais extremadamente rápidos, como o movemento dos electróns en escalas de attosegundos (10⁻¹⁸ s). Grazas aos seus avances en tecnoloxía láser, hoxe é posible rexistrar estes movementos cunha resolución temporal sen precedentes.
A Biblioteca Intercentros de Física e Óptica e Optometría da USC tamén conmemora a figura da Nobel cunha ‘Mostra bibliográfica das obras de Anne L’Huillier na BUSC’, que se pode visitar na Sala de lectura de Física ata o 9 de outubro. A exposición inclúe artigos, libros, entrevistas e publicacións recentes da científica.
