O Servizo Galego de Saúde (Sergas) publicou no Portal de Contratos Públicos de Galicia a licitación dun proxecto destinado a implementar actuacións de mellora enerxética no Hospital Gil Casares, que forma parte do Complexo Hospitalario Universitario de Santiago de Compostela. O importe da contratación ascende a 85.721,43 euros.
Esta iniciativa responde á necesidade de cumprir coa normativa europea de descarbonización, así como á redución do impacto ambiental e á optimización do gasto en subministracións, garantindo ademais o confort dos usuarios.
As medidas de eficiencia enerxética previstas inclúen o illamento de fachadas mediante SATE, a substitución de fiestras e portas exteriores por carpinterías de aluminio con rotura de ponte térmico e vidros dobres, a renovación das cubertas, a instalación dun novo sistema de iluminación LED e a implantación de bombas de calor.
As empresas interesadas teñen de prazo ata o vindeiro 14 de outubro para presentar as súas ofertas.
O Servizo Galego de Saúde reafirma así o seu compromiso coa mellora enerxética, un labor xa recoñecido en diversas ocasións, incluíndo os Premios á Acción Climática 2025. Estes galardóns, organizados polo Desafío Climático da Atención Sanitaria, distinguen a institucións sanitarias que lideran o camiño cara a unha atención médica máis sostible.
Na última edición destes premios, a área sanitaria de Santiago de Compostela e Barbanza recibiu un triplo recoñecemento: categoría Ouro en Mitigación, Ouro en Liderado Climático e Prata en Resiliencia Climática, polos seus esforzos na redución de emisións, o seu compromiso institucional e a preparación das súas infraestruturas fronte ao cambio climático.
Estes recoñecementos son froito de medidas xa adoptadas no Complexo Hospitalario Universitario santiagués, como a substitución do gasóleo por electricidade e gas, e da iluminación fluorescente por LED, ademais de dispositivos de control de luz. No Hospital da Barbanza instalouse unha planta de biomasa e outra fotovoltaica, e nos centros de saúde desenvólvese un plan de infraestruturas para mellorar envolventes, cubertas e substituír caldeiras.
