A conselleira de Política Social e Igualdade, Ángeles Vázquez, mantivo esta mañá un encontro coa directiva da Plataforma de Organizacións de Infancia en Galicia (POIG), entidade que aglutina as principais organizacións que traballan no ámbito da infancia e a adolescencia na comunidade autónoma.
Durante a reunión, na que tamén participaron Victorino Escamilla, vicepresidente; Julio Barreiro, secretario xeral; Xesús Vilas, tesoureiro; e Inés Salteiro, directora da POIG, a conselleira destacou o obxectivo compartido entre a Xunta e a plataforma: garantir a protección, o benestar e o desenvolvemento integral de todos os nenos e adolescentes galegos.
Neste sentido, Ángeles Vázquez manifestou a firme vontade do Goberno autonómico de continuar colaborando estreitamente coas entidades que dedican os seus esforzos á defensa dos dereitos da infancia. A conselleira aproveitou tamén para agradecer o labor incansable que estas organizacións desenvolven no día a día.
