A Confederación de Empresarios de Galicia (CEG) celebrou en Santiago de Compostela o foro "Regreso ao futuro da prevención de riscos laborais", organizado en colaboración coa Sociedade Galega de Prevención de Riscos Laborais (SGPRL) e a Xunta de Galicia. O encontro tivo como obxectivo analizar a sinistralidade laboral, así como a evolución, os desafíos actuais e as boas prácticas en materia de seguridade e saúde no traballo.
A CEG considera que a prevención de riscos laborais "debe entenderse como unha inversión estratéxica nas persoas, na sustentabilidade das empresas e na competitividade do tecido produtivo galego". Trinta anos despois da aprobación da Lei de Prevención de Riscos Laborais, o reto céntrase en seguir avanzando na redución da sinistralidade e consolidar unha cultura preventiva integrada na xestión diaria das organizacións, mediante a formación, a información, a sensibilización e a aplicación de boas prácticas adaptadas á realidade de cada sector e empresa.
Subliñan que este compromiso, especialmente nun tecido empresarial composto maioritariamente por pemes e micropemes, require facilitar ferramentas e asesoramento que permitan converter as obrigacións preventivas en medidas eficaces e aplicables. A transformación dos contornos laborais esixe anticiparse a novos riscos e adaptar as estratexias preventivas aos cambios tecnolóxicos, demográficos e organizativos, prestando especial atención aos riscos psicosociais e o benestar das persoas traballadoras.
Neste contexto, a CEG defende "a colaboración entre administracións, organizacións empresariais e sindicais, así como un diálogo social real que incorpore o coñecemento e a experiencia de quen coñecen de primeira man a realidade dos centros de traballo". O obxectivo é avanzar cara a un modelo de prevención máis eficaz, práctico e adaptado ás necesidades das empresas e das persoas.
Recentemente, a CEG aprobou o Plan integral para a mellora da prevención, o benestar laboral e a reincorporación saudable ao traballo en Galicia 2026-2029. Este acordo destaca a importancia do diálogo social para atopar solucións compartidas, combinando a protección dos traballadores coas necesidades empresariais e o uso responsable dos recursos públicos. Entre as medidas preventivas, menciónanse o reforzo na prevención de trastornos músculo esqueléticos e riscos psicosociais, programas de prevención avanzada, unha ferramenta de autoevaluación sectorial gratuíta e axudas á inversión en equipamento ergonómico nas pemes.
O plan tamén inclúe medidas para o benestar laboral, como a Estratexia de Benestar Laboral e a Promoción da saúde, con programas de atención psicolóxica e musculoesquelética. Abórdase ademais a reincorporación despois dunha incapacidade temporal, buscando un modelo que acompañe o retorno seguro ao traballo. A nivel estatal, reforzase a especialidade de Medicina do Traballo.
A apertura institucional do evento contou coa participación do vicepresidente da CEG, Antonio Fontenla, e da xerente do Instituto de Seguridade e Saúde Laboral de Galicia (ISSGA), Adela Quinzá-Torroja. Tamén interviron o presidente da Sociedade Galega de Prevención de Riscos Laborais, Carlos Montes, e moderouse unha mesa redonda con responsables de empresas como Civis Global, Ence, Grupo Arestora, Navantia Ría de Ferrol e Grupo Nogar.
