O conselleiro de Facenda e Administración Pública, Miguel Corgos, avanzou que as contas da Xunta para o ano 2027 continuarán a reforzar o gasto social, cunha suba por riba da media do crecemento do orzamento e con melloras no acceso á vivenda, considerada a máxima prioridade desta lexislatura.
Así mesmo, o Goberno galego manterá o seu compromiso coa transformación do modelo produtivo mediante unha aposta polo investimento en I+D+i e pola mellora da formación para impulsar o crecemento empresarial. Ademais, buscarase aproveitar a riqueza dun Xacobeo 2027, que se espera que sexa "o mellor da historia".
O conselleiro reuniuse esta mañá en Santiago de Compostela cos axentes económicos e sociais para informarlles sobre o proceso de elaboración dos Orzamentos para 2027 e avaliar a evolución da economía galega. Destacou que esta evolución está a ser mellor do agardado inicialmente, segundo se anunciou na aprobación do Teito de Gasto.
Corgos sinalou que para 2027, Galicia poderá encadear sete anos de crecemento económico, cunha evolución máis positiva que a media de España na postpandemia. No que respecta ao mercado laboral, indicou que a taxa media de paro, estabilizada por baixo do 10% nos últimos dous anos, situarase próxima ao 8% este ano e por debaixo desta cifra o vindeiro, achegándose aos mínimos históricos.
Ademais, confirmou que 2027 será o cuarto ano consecutivo cun orzamento en estabilidade, sen necesidade de novo endebedamento. A Administración autonómica galega xa ten reservada a partida necesaria para revalorizar nun 5% os salarios dos empregados públicos, e o Capítulo 1 dos orzamentos tamén recollerá melloras retributivas autonómicas pactadas nos eidos educativo, sanitario e xudicial.
O conselleiro de Facenda concluíu subliñando que a estabilidade permitirá que a Xunta presente o seu proxecto de Orzamentos en tempo e forma, en contraste coa situación en España, onde a lexislatura remata sen ningún orzamento en tres anos.
