O Consello Consultivo de Galicia, xunto con persoal do órgano con competencias en Transparencia, estivo presente no XI Congreso Internacional de Transparencia e Goberno Aberto 2026, organizado pola Asociación Centro de Investigación de la Transparencia y el Gobierno Abierto (CIT) en Santiago de Compostela. Este evento conta coa colaboración da Universidade de Santiago de Compostela (USC), a Universidad Complutense de Madrid e a Universidad Central de Chile, ademais do apoio da Xunta de Galicia, a Comunidade de Madrid, o Consello de Contas de Galicia e a Comisión da Transparencia de Galicia.
Na inauguración formal do congreso, Andrés Lago, presidente do Consello Consultivo de Galicia e da Comisión da Transparencia de Galicia, estivo acompañado por autoridades como o presidente da Xunta de Galicia, Alfonso Rueda; a reitora da USC, Rosa M. Crujeiras; a presidenta do Consejo de Transparencia y Buen Gobierno (CTBG), Concepción Campos; a directora do Centro de Estudos Políticos e Constitucionais, Rosario García Mahamut; e o vicerreitor académico da Universidad Central de Chile, Emilio Oñate Vera.
Ademais, Andrés Lago interveu como relator na Sesión Plenaria titulada “Retos e desafíos dos órganos garantes de la transparencia”, coordinada polo CTBG. Nesta sesión tamén participaron representantes de órganos de transparencia estatais e doutras comunidades autónomas como Cataluña, Andalucía, Murcia, Castela-A Mancha, Canarias, Navarra, Comunidade de Madrid e Castela e León.
Desde o pasado 1 de maio de 2026, a Comisión da Transparencia funciona como un órgano colexiado independente adscrito ao Consello Consultivo de Galicia. A súa función principal é resolver as reclamacións relativas ao acceso á información pública, conforme ao establecido na Lei 1/2016, de 18 de xaneiro, de transparencia e bo goberno, modificada pola Lei 5/2025, do 23 de decembro.
