O sistema, desenvolvido xunto coa Universidade de Michigan, utiliza grandes modelos de linguaxe para xerar conversas realistas entre terapeutas e pacientes simulados, abrindo novas posibilidades para a aprendizaxe de habilidades de comunicación e interacción no ámbito da saúde mental. O acceso a conversas terapéuticas reais é limitado pola confidencialidade da información, polo que ROGERS busca ser un recurso educativo.
O traballo foi presentado polo investigador do CiTIUS David E. Losada na Information Processing & Management Conference 2026, celebrada do 30 de outubro ao 1 de novembro en Wuhan. A contribución foi seleccionada para unha sección sobre intelixencia artificial conversacional e contextual para a saúde mental. As primeiras avaliacións con especialistas sanitarios apoian o seu potencial como ferramenta formativa.
A investigación foi desenvolvida conxuntamente por Anxo Fernández-Villoch, Marcos Fernández-Pichel (investigadores do CiTIUS) e David E. Losada, en colaboración co profesor John Piette da Universidade de Michigan.
ROGERS parte de resultados previos e adapta grandes modelos de linguaxe (LLM) para actuar como terapeutas, seguindo principios da Entrevista Motivacional e da Terapia Cognitivo-Condutual. O sistema combina distintos axentes de IA para reproducir conversas entre terapeutas e pacientes virtuais, construídos a partir de perfís psicolóxicos e historias coherentes.
As avaliacións realizadas con expertos revelaron interaccións naturais e realistas, apoiando o seu potencial educativo. Os investigadores tamén observaron que unha configuración coidada das instrucións dos modelos pode favorecer respostas colaborativas e empáticas. O CiTIUS está a consolidar ROGERS como unha ferramenta formativa interactiva que permite ás usuarias practicar estratexias de interacción e analizar as súas respostas, complementando a formación de profesionais da saúde mental.
