O estudantado de graos da USC que na súa etapa de Bacharelato cursase o STEMbach xa se pode preinscribir neste programa, unha actividade recoñecida con 1,5 créditos ECTS por curso académico, ata un máximo de 6 créditos.
Quen obtivera o título STEMbach no instituto desde o curso 2019-2020 en adiante dispón ata o 13 de outubro para formalizar a solicitude a través da Secretaría Virtual. Posteriormente, do 16 ao 21 de outubro será o prazo para a matrícula. As persoas solicitantes deberán remitir a stembach@usc.gal a certificación académica do centro onde se cursou o Bacharelato.
Baixo a coordinación do Programa A Ponte da USC, as actividades consistirán principalmente no apoio ao estudantado que estea cursando no seu instituto o Bacharelato STEMbach, titorizado por algún docente do centro onde estea a realizar os seus estudos de grao. A participación nas xornadas de benvida da USC e a colaboración cos centros nas xornadas dos Encontros na Zona USC son outras das encomendas.
As persoas que se matriculen por vez primeira neste programa terán que realizar un curso de formación de 4 sesións. Estas terán lugar os días 15, 29, 30 e 31 de marzo na Facultade de Dereito (Campus Vida, Santiago de Compostela) e na Facultade de ADE (Campus de Lugo).
A avaliación positiva da realización das actividades do programa dará dereito ao recoñecemento de 1,5 créditos ECTS por curso académico nas titulacións de grao, cun máximo acumulable de 6 créditos ECTS.
