A Comisión da Transparencia de Galicia sinala un notable aumento nos últimos anos no número de expedientes con reclamacións por solicitudes de acceso a información pública das Administracións galegas. Este foi un dos temas centrais da Sesión Plenaria "Retos e desafíos dos órganos garantes da transparencia", celebrada hoxe en Santiago de Compostela, no marco do XI Congreso Internacional de Transparencia e Goberno Aberto.
Andrés Lago Louro, presidente do Consello Consultivo de Galicia e Comisionado da Transparencia, participou na análise do traballo dos órganos garantes do cumprimento normativo. Lago lembrou que a función de Comisionado de Transparencia, adscrita inicialmente á Valedora do Pobo, pasou ao Consello Consultivo de Galicia o pasado 1 de maio de 2026, en virtude da Lei 5/2025.
Desde o 1 de maio ata o 25 de setembro de 2026, a Comisión xestionou 607 expedientes de petición de información pública, principalmente dirixidos a concellos e departamentos da Xunta. Máis da metade destes expedientes foron resoltos dentro do prazo legal. A estes súmanse os 74 expedientes xestionados pola Valedora nos catro meses anteriores, sumando un total de 681 expedientes en nove meses de 2026. En comparación, en 2025 atendeuse 709 expedientes e en 2024 foron 249.
Lago alertou sobre o risco de colapso dos órganos garantes debido ao aumento exponencial das reclamacións. Subliñou a necesidade de que estes órganos dispoñan de medios e recursos suficientes, así como do establecemento de criterios claros e unificados para garantir unha maior seguridade xurídica.
Como oportunidade e meta futura, o presidente da Comisión da Transparencia destacou a importancia de intercambiar experiencias, reforzar a cooperación e a formación, consolidando redes de colaboración entre os distintos órganos autonómicos e estatais, como a Conferencia de Órganos Garantes da Transparencia e o Acceso á Información Pública (COTAI).
No congreso tamén participaron representantes do Consejo de Transparencia y Buen Gobierno (CTBG), da Comisión de Garantía do Dereito de Acceso á Información Pública de Cataluña (GAIP), e dos órganos de transparencia de Andalucía, Murcia, Castela-A Mancha, Canarias, Navarra, Madrid e Castela e León.
O Congreso CIT 2026, organizado pola Universidade de Santiago de Compostela (USC), a Universidade Complutense de Madrid e a Universidade Central de Chile, conta co apoio da Xunta de Galicia e outras institucións.
