O conselleiro de Sanidade, Antonio Gómez Caamaño, e a presidenta de Fegerec, Francisca Luengo, asinaron a renovación do acordo de colaboración que permitirá realizar rehabilitación especializada a pacientes con enfermidades raras e neurodexenerativas a través da fisioterapia.
O Servizo Galego de Saúde incrementa a súa achega económica ata os 32.803 euros. O obxectivo principal desta colaboración é mellorar a calidade de vida dos pacientes e das súas familias, así como manter ou aumentar a súa autonomía nas actividades diarias. Tamén se busca previr complicacións respiratorias, musculoesqueléticas, circulatorias ou ortopédicas.
Este convenio enmárcase na Estratexia Galega en Enfermidades Raras 2025-2030 da Xunta, que prevé un investimento total de case 400 millóns de euros. A estratexia inclúe medidas para impulsar un proxecto pioneiro de rehabilitación funcional domiciliaria para pacientes pediátricos con enfermidades raras.
O novo programa beneficiará a pacientes menores de 15 anos con diagnóstico ou sospeita dunha enfermidade rara, que recibirán rehabilitación funcional prescrita polo seu especialista médico no seu propio domicilio. Ademais, foméntase a autonomía do paciente e a formación do coidador principal.
A rehabilitación funcional abranguerá prestacións de fisioterapia, terapia ocupacional e logopedia, contribuíndo tamén á mellor adhesión aos tratamentos por parte dos doentes.
