A delegada territorial da Xunta en Vigo, Ana Ortiz, e a vicepresidenta da Deputación de Pontevedra, Luisa Sánchez, mantiveron este martes unha xuntanza cos responsables da Asociación Sociocultural e Deportiva Over, organizadores da Xornada Cultural Mar de Galicia. O encontro tivo lugar no Museo do Mar co obxectivo de axendar de novo o festival, previsto inicialmente para o pasado 18 de xullo e cancelado polo Concello de Vigo poucas horas antes da súa celebración.
Ambas institucións confirmaron o seu apoio á iniciativa cultural. "A Xunta de Galicia continuará dando o apoio a eventos culturais na nosa cidade e agarda que se poida recuperar canto antes a actividade prohibida polo goberno local", sinalou Ana Ortiz, quen lamentou o que cualificou como "un ataque" á cultura local debido a un proceso administrativo que non deu marxe aos organizadores para cumprir os requisitos solicitados polo Concello.
Pola súa banda, Luisa Sánchez expresou a súa estrañeza pola suspensión: "A día de hoxe seguimos sen saber por que unha actividade que presentou a solicitude dos permisos con máis dun mes e medio de antelación acabou suspendida con menos de 24 horas de marxe". Considera necesario que o Concello de Vigo ofreza explicacións e implante protocolos máis áxiles, destacando os múltiples afectados: artistas locais, asociacións culturais e hostalería.
A vicepresidenta da Deputación afirmou que tanto a Deputación como a Xunta seguirán apoiando á música local e o desenvolvemento libre da súa actividade en Vigo. Sánchez tamén suxeriu que a cancelación podería deberse a un "veto" por parte do alcalde, Abel Caballero, cara á cultura "sen tutelas" e á colaboración entre a Xunta e a Deputación.
“"Caballero está a botar un pulso á cidade con esta espiral de prohibicións. E vaino a perder. Empeza pola música local, segue polas pantallas para ver á selección española, continúa por unha xornada cultural... Que será o seguinte?. Ningún vigués chegou a imaxinar nunca o PSOE convertería a cidade da movida na cidade do ‘prohibido divertirse’."
