O acordo busca mellorar o benestar emocional, a autonomía, a inclusión e a participación social dos adultos con TEA, ademais de ofrecer apoio ás súas familias. O programa tamén incorpora unha perspectiva de xénero, prestando especial atención ás mulleres con TEA, debido ás dificultades de detección e ao infradiagnóstico que adoitan afectar a este colectivo.
A directiva de Asperga presentou á conselleira os principais retos da entidade e as súas necesidades, co obxectivo de avaliar novas vías de colaboración para reforzar a atención ás persoas que máis o precisan.
Neste sentido, a conselleira lembrou que a Xunta traballa no primeiro Plan Galego de Autismo, que busca o reforzo de recursos e intervencións dirixidas ao diagnóstico, á atención temperá, á garantía da saúde integral e a unha resposta educativa inclusiva. O plan tamén abordará o impulso da transición á vida adulta, facilitando o acceso ao emprego e á formación.
