As probas realizaranse os días 2, 3 e 4 de decembro de forma presencial nas aulas CeMIT de 47 concellos de toda Galicia. A inscrición está aberta dende hoxe ata o mércores 4 de novembro incluído. Esta certificación acredita o nivel de competencia das persoas na utilización das tecnoloxías dixitais no eido persoal, social e profesional.
Repartiranse en 88 quendas con diferentes horarios de mañá (10 e 12 horas) e de tarde (16:30 horas). Os lugares, datas e horarios concretos poden consultarse na páxina web da rede CeMIT (https://cemit.xunta.gal). Tras o prazo de inscrición, se quedan prazas vacantes, abrirase un período extraordinario.
Os contidos formativos para preparar a proba están dispoñibles na plataforma de teleformación da Rede CeMIT (https://formacion-cemit.xunta.gal). Para obter o certificado ComDix Iniciación é preciso superar un cuestionario tipo test de entre 60 e 70 preguntas que avalía as 21 competencias do Marco Galego ComDix.
Durante o ano 2026 convocáronse 5.198 prazas para obter a certificación (2.058 no nivel iniciación e 3.140 no intermedio). Continuarán en 2027 con novas convocatorias para o primeiro semestre, que se publicarán no Diario Oficial de Galicia a comezos de ano. Prevese convocar o nivel Intermedio a finais de febreiro e xuño, e o nivel Iniciación en abril.
