A resolución, publicada hoxe no Diario Oficial de Galicia, detalla as subvencións outorgadas entre o 20 de febreiro e o 6 de maio, enmarcadas na convocatoria lanzada en agosto de 2025. Estas axudas buscan dar resposta á carencia de condutores profesionais no sector do transporte de mercadorías e viaxeiros por estrada.
A medida desenvólvese a través de dúas liñas de axuda. Unha delas subvenciona os cursos para obter o certificado de aptitude profesional (CAP) en modalidade inicial, de ampliación ou promoción. A outra liña cobre a obtención dos permisos de condución das clases C e D, incluíndo as súas variantes (C+E, C1, C1+E, D, D+E, D1, D1+E).
Para poder beneficiarse destas subvencións, as persoas interesadas debían ser maiores de idade, estar empadroadas en Galicia con anterioridade ao inicio do período subvencionable e matricularse nun Centro de Formación CAP ou nunha autoescola da comunidade.
O importe máximo subvencionable por alumno para o curso de cualificación inicial (mercadorías ou viaxeiros) é de 1.200 euros, mentres que para o curso de ampliación ou promoción é de 300 euros. Para a obtención dos permisos de condución das clases C ou D, a contía máxima subvencionable é tamén de 1.200 euros por alumno.
Coa posta en marcha desta iniciativa, a Xunta pretende mellorar as posibilidades de empregabilidade dun sector da poboación, ao tempo que se busca paliar a escaseza de condutores profesionais, un problema xeneralizado nas empresas de loxística da Unión Europea.
