O Consello do Goberno galego deu luz verde aos textos dos Estatutos das mulleres do rural e do sector marítimo-pesqueiro, que entran na súa fase final de tramitación coa súa remisión ao Consello Consultivo. O conselleiro de Presidencia, Xustiza e Deportes, Diego Calvo, informou que o obxectivo é que ambos os documentos “estean aprobados a finais de ano”.
Estes estatutos buscan recoñecer, valorar e visibilizar o papel das mulleres nestes eidos, garantir o seu acceso en igualdade a dereitos, oportunidades e recursos, fomentar a súa contratación en profesións masculinizadas e impulsar a titularidade compartida en explotacións e embarcacións.
O Estatuto do rural promoverá que polo menos o 40 % dos órganos de goberno do tecido asociativo rural estea formado por mulleres, ademais de fomentar o acceso ao traballo agrario, o autoemprego, a formación e a corresponsabilidade.
Pola súa banda, o texto para as mulleres do mar recolle medidas para fomentar a contratación feminina en profesións masculinizadas, adaptar equipos e embarcacións con perspectiva de xénero e impulsar a titularidade compartida. Tamén se modifica o regulamento do Consello Galego de Pesca para garantir a representación das organizacións de mulleres do mar.
Ambos os documentos establecen medidas concretas para fomentar o emprego, a formación, a conciliación, a saúde laboral e o emprendemento feminino, así como a participación das mulleres nos espazos de decisión e representación.
