A actuación, adxudicada á empresa Francisco Gómez y Cia, S.L., enmárcase no convenio de colaboración asinado pola Consellería de Vivenda e Planificación de Infraestruturas e o Concello de Boqueixón, ao abeiro do Plan Hurbe da Xunta. Este plan apoia ás administracións locais na execución de obras de mellora de contornas urbanas, accesibilidade e equipamentos públicos.
As intervencións céntranse na rúa Castrelo e na avenida do Vinteseis, co obxectivo de integrar urbanisticamente as vivendas próximas. Na rúa Castrelo renovarase a beirarrúa, instalarase bordo e proxectarase unha senda peonil de 120 metros. Tamén se renovará a capa de rodaxe e a sinalización.
Na avenida do Vinteseis reformaranse as beirarrúas existentes e executaranse novas para dar servizo a un novo espazo de aparcamento. Incluirase tamén a execución da rede de pluviais, alumeado, así como a plantación de céspede, árbores e a colocación de mobiliario urbano.
O convenio establece que a Consellería de Vivenda asumirá o 70% do orzamento, mentres que o Concello de Boqueixón achegará o 30% restante.
