Durante a súa resposta a unha interpelación parlamentaria, Nicolás Vázquez explicou que o progreso de Galicia require contar cunha Administración ambiental forte, profesional, independente e rigorosa. Incidiu en que todas as decisións adoptadas pola Consellería de Medio Ambiente e Cambio Climático atenden aos valores ambientais, aos estudos técnicos e á normativa vixente.
O conselleiro salientou que os procedementos de avaliación ambiental son claves para garantir a compatibilidade da protección dos valores ambientais do territorio co desenvolvemento de proxectos industriais. Tamén avogou por trasladar á cidadanía información clara e correcta sobre a tramitación ambiental.
En relación coa infraestrutura verde, Vázquez recalcou a importancia de usar a terminoloxía de xeito correcto, diferenciando entre a Estratexia de infraestrutura verde como instrumento de planificación e a infraestrutura verde como rede territorial. Subliñou que a inclusión dun espazo nesta categoría cartográfica "non suporía, por si mesma, unha prohibición absoluta de toda actividade", senón que se determinaría a súa compatibilidade e condicións no marco da avaliación ambiental.
Para concluír, Nicolás Vázquez destacou que asume a súa responsabilidade ao fronte da Consellería co obxectivo de garantir que "todos os proxectos sen excepción sexan avaliados co mesmo rigor e coas mesmas garantías".
