Esta iniciativa conxunta xorde dunha reunión en Madrid entre representantes de Unións Agrarias, UPA e a Asociación Española de Distribuidores, Autoservicios y Supermercados (ASEDAS). O obxectivo principal é reforzar a recomendación de que a comercialización da marca branca nas grandes superficies se rexa por criterios de orixe e envasado no país.
Ambas as partes buscan así deter o deterioro da renda dos produtores lácteos galegos, que se viron gravemente afectados pola baixada das cotizacións imposta pola industria. Desde ASEDAS, que representa o 80% dos supermercados en España, expresaron a súa solidariedade cos gandeiros e instaron ás industrias a basear os contratos de aprovisionamento en criterios de mercado.
Unións Agrarias destacou a perda de posicións de Galicia no prezo medio do leite, rexistrando diferenciais negativos fronte a rexións veciñas como Castela e León (13,5% superior) e Asturias (24,3% superior). A organización advirte que, de non corrixirse, esta situación podería supoñer unha caída de ingresos de máis de 186 millóns de euros para o sector galego, o que equivalería a uns 38.000 euros por explotación das 4.893 granxas activas.
“"É necesario modificar os contratos de recollida de leite, que foron impostos de forma unilateral polas industrias e aceptados por moitos produtores ante o temor a que se lles paralizase a recollida."
O sindicato agrario tamén subliña que a actuación das empresas lácteas é aínda máis grave nun contexto de forte aumento dos custos de produción, agravado pola situación internacional, e nunha época de intensa actividade no campo. Fan un chamamento á responsabilidade da industria, xa que moitas explotacións, especialmente as máis novas, poderían verse abocadas ao peche.
Ademais, Unións Agrarias denunciou ante a Axencia de Información e Control Alimentarios (AICA) a posible formación dun “novo cártel do leite”, baseado en prácticas de concertación ilegal de prezos para forzar baixadas de cotización. Esta conduta, segundo a organización, choca coa Lei da Cadea Alimentaria, que establece que a formación de prezos debe ter en conta os custos reais de produción. O sindicato tamén instou á Comisión Nacional dos Mercados e a Competencia (CNMC) a actuar contra as industrias que importan leite de terceiros países a prezos moi baixos.
