A Xunta de Galicia, a través do Diario Oficial de Galicia (DOG), deu a coñecer a resolución da Dirección Xeral de Recursos Humanos do Sergas coa orde de prelación e puntuación dos admitidos. Estas listas definitivas entrarán en vigor para os chamamentos o vindeiro 5 de agosto.
As especialidades incluídas neste proceso son: enfermeiro especialista en enfermería de saúde mental, enfermeiro especialista en enfermería do traballo, enfermeiro especialista en enfermería familiar e comunitaria, enfermeiro especialista en enfermería obstétrico-xinecolóxica (matrón), enfermeiro especialista en enfermería pediátrica, médico de familia, médico de urxencias hospitalarias, médico coordinador do 061, médico asistencial do 061, pediatra de atención primaria e técnico de saúde de atención primaria.
A categoría con maior número de admitidos é a de médico de familia, con 941 profesionais, seguida de preto de enfermeiro especialista en enfermería familiar e comunitaria, con 804, e médico de urxencias hospitalarias, con 600.
O resto de admitidos distribúense nas seguintes especialidades: 100 en enfermeiro especialista en enfermería de saúde mental; 122 en enfermeiro especialista en enfermería do traballo; 526 en enfermeiro especialista en enfermería obstétrico-xinecolóxica (matrón); 188 en enfermeiro especialista en enfermería pediátrica; 130 en médico coordinador do 061; 220 en médico asistencial do 061; 127 en pediatra de atención primaria; e 260 en técnico de saúde de atención primaria.
En comparación co proceso anterior, rexistráronse 402 novas inscricións, o que supón un 13,32% do total. Estas novas altas distribúense entre as diferentes especialidades, sendo as máis significativas as de médico de familia (146 novas inscricións) e enfermeiro especialista en enfermería familiar e comunitaria (156).
As listas están dispoñibles na páxina web do Servizo Galego de Saúde ([www.sergas.es](http://www.sergas.es)), no apartado de Emprego Público-Listaxes de persoal estatutario. Os aspirantes tamén poden consultar o estado das súas solicitudes no seu expediente electrónico persoal en Fides/expedient-e.
Ademais, o Sergas anunciou que proximamente publicará as listas provisionais para outras categorías como celador, técnico en farmacia, técnico superior en anatomía patolóxica, auxiliar administrativo, persoal de servizos xerais, cociñeiro e pinche.
