O Servizo Galego de Saúde (Sergas) publicou hoxe no Portal de Contratos Públicos de Galicia a licitación dun sistema de normohipotermia destinado ao servizo de Cirurxía Cardíaca do Hospital Clínico Universitario de Santiago de Compostela (CHUS). A inversión ascende a 50.820 euros.
Este equipo, que se suma ao xa existente no complexo hospitalario, ten como finalidade regular de forma precisa a temperatura do paciente, do circuíto sanguíneo e do miocardio. Isto garante a estabilidade fisiolóxica durante intervencións cirúrxicas cardíacas de alta complexidade.
A adquisición deste equipamento busca mellorar a seguridade do paciente nos procedementos de cirurxía cardíaca e asegurar a dispoñibilidade operativa dos sistemas de control térmico empregados nos quirófanos. Tamén reforzará a capacidade operativa do servizo ante o incremento da actividade cirúrxica.
Ademais, permitirá incorporar unha tecnoloxía actualizada que mellore a precisión e fiabilidade do control térmico, contribuíndo a unha maior seguridade clínica e eficiencia nas intervencións. A necesidade de dispoñer dun equipo adicional faise patente polo incremento da actividade asistencial e a conveniencia de asegurar a continuidade en caso de incidencias técnicas ou de mantemento.
As empresas interesadas en participar neste procedemento teñen de prazo ata o vindeiro 15 de setembro para presentar as súas ofertas.
