A Consellería de Sanidade vén de participar nas xornadas europeas Praise-U e Praise-U+, celebradas en Bruxelas (Bélxica) o pasado 13 de setembro de 2026. Estas reunións tiveron como obxectivo impulsar un modelo de cribado do cancro de próstata, avaliando os seus resultados e identificando estratexias eficientes para a súa futura implantación a nivel europeo.
Representantes da Dirección Xeral de Saúde Pública compartiron experiencias con especialistas europeos sobre a pilotaxe de cribado do cancro de próstata que se está a desenvolver en Galicia. O programa de detección precoz galego foi presentado dentro da sesión "Implementation in practice: lessons from pilots sites", onde se detallou o desenvolvemento da pilotaxe e os principais retos e oportunidades identificados.
Durante o encontro, abordáronse cuestións clave na detección e tratamento do cancro de próstata, como o papel da resonancia magnética e da biopsia, a avaliación clínica e económica dos programas, a experiencia dos pacientes e a escalabilidade dos modelos piloto. Tamén se afondou na incorporación da intelixencia artificial e nas desigualdades no acceso ao cribado como ámbitos de traballo do proxecto.
A nova fase Praise-U+ pretende consolidar o coñecemento xerado polo proxecto Praise-U, desenvolvido durante tres anos e medio, e avanzar cara modelos de cribado máis sostibles. Nesta etapa, prestarase especial atención á intelixencia artificial, á equidade no acceso, ao intercambio de datos e imaxes, á avaliación do impacto e custos, e ao desenvolvemento de estratexias para chegar aos homes con maiores dificultades de acceso.
A participación da Consellería de Sanidade neste proxecto reforza o papel de Galicia no contexto europeo, co obxectivo común de avanzar cara un novo modelo de prevención e detección precoz do cancro de próstata, integrando evidencia científica, innovación e a perspectiva cidadá para mellorar os resultados en saúde.
