O titular de Sanidade destacou a intensa actividade asistencial dos servizos de psiquiatría das sete áreas sanitarias galegas durante o primeiro semestre do ano, período no que se realizaron preto de 217.000 consultas, das cales aproximadamente 80.000 foron de psicoloxía clínica.
A Xunta aprobou recentemente o Plan Estratéxico de Saúde Mental de Galicia 2026-2030, dotado cun orzamento de 177 millóns de euros. Este plan supón un incremento de case o 50% do persoal sanitario especializado respecto ao anterior e reforza a rede sanitaria pública con 357 novas incorporacións, incluíndo 124 facultativos especialistas en psiquiatría e psicoloxía clínica.
O plan tamén contempla unha dotación de 12 millóns de euros destinada a obras e equipamentos nas sete áreas sanitarias da comunidade.
Galicia dispón actualmente dunha rede ampla para a atención de adultos, que inclúe 45 unidades de saúde mental, 252 camas de hospitalización breve e 177 prazas de hospital de día.
No que respecta á saúde mental infanto-xuvenil, a comunidade conta con 10 unidades específicas, 18 camas de hospitalización e 92 prazas de hospital de día.
Ademais, a rede de saúde mental complétase con dispositivos de rehabilitación hospitalaria e unha rede comunitaria que suma máis de 1.400 prazas en centros de rehabilitación, pisos protexidos e unidades residenciais.
O Plan Estratéxico de Saúde Mental 2026-2030 pon especial énfase na infancia e adolescencia, prevendo ampliar progresivamente a atención ata os 18 anos e a creación de novas unidades de hospitalización na Coruña, Ferrol e Ourense, co obxectivo de máis que duplicar a capacidade actual.
Así mesmo, o plan prevé incrementar polo menos un 20% as prazas de rehabilitación comunitaria, estender a hospitalización a domicilio e reforzar os equipos de continuidade de coidados.
O conselleiro tamén sinalou que a prevención do suicidio forma parte do compromiso coa atención e a continuidade dos coidados. Galicia dispón de sete unidades de prevención intensiva, unha por área sanitaria, e do Código Agarimo como vía rápida para menores en risco.
Gómez Caamaño recoñeceu o labor dos profesionais que fan posible esta atención de calidade.
