Durante a súa intervención, a conselleira defendeu que a PAC estea dotada cun orzamento suficiente, sen recortes, e que manteña a súa condición de política común. Mostrou o seu desacordo coa rebaixa do 20 % dos fondos e coa desaparición do segundo piar, o de desenvolvemento rural, dentro do Marco financeiro plurianual.
Gómez sinalou que "Non podemos aceptar que o futuro das explotacións galegas dependa cada vez máis da capacidade financeira de cada Estado membro nin que o desenvolvemento rural perda peso dentro das políticas europeas". Ademais, reclamou ao Goberno central que cumpra coa súa responsabilidade negociadora cunha posición ambiciosa.
Lembrou tamén a demanda trasladada ao ministro Luis Planas para que solicite na UE unha moratoria na entrada en vigor do caderno dixital das explotacións, previsto para o 1 de xaneiro de 2027, co obxectivo de evitar novas cargas administrativas e custos ás pequenas explotacións.
A conselleira fixo fincapé na postura común acadada coas organizacións agrarias, que reivindicou unha PAC con financiamento suficiente, o mantemento dos dous piares, os fondos diferenciados e a protección do desenvolvemento rural.
