A tarifa media diaria hoteleira en Santiago bateu a súa marca este verán, alcanzando os 105,31 euros en xullo, segundo os datos do Instituto Nacional de Estatística (INE). Este incremento supón un 4,47% máis que o ano anterior, uns 4,5 euros de suba.
Con esta cifra, a capital galega sitúase como a segunda urbe máis cara de Galicia, só por detrás da Coruña, cuxos hoteis rexistraron unha tarifa media de 113,94 euros. Vigo sitúase en terceiro lugar con 100,14 euros, mentres que Ourense (70,70 euros) e Lugo (60,13 euros) presentan prezos inferiores.
Este récord de prezos coincide coa aplicación da taxa turística, que xa xerou 1.759.452,21 euros para o Concello de Santiago nos seus primeiros nove meses de vixencia, dende outubro de 2025.
A serie histórica indica que Santiago foi a cidade galega coa tarifa media máis elevada dende 2021, agás en 2023 cando a Coruña a superou lixeiramente. A evolución anual mostra un incremento constante en Santiago, mentres que noutras cidades os prezos alternaron subidas e baixadas.
O portavoz da Unión Hotelera Compostela, José Antonio Liñares, considera positiva esta evolución, que permite ao sector recuperar terreo tras a pandemia e mellorar a rendibilidade dos establecementos. Reclama, ademais, diversificar o turismo máis aló do verán, potenciando meses como abril e setembro con congresos e festivais para atraer un turismo de maior valor.
