A doutora Sara Troitiño Cora suma unha nova liña de investigación ao CiMUS da USC tras defender a súa tese doctoral titulada “O receptor plaquetario de coláxeno GPVI como diana terapéutica e marcador de risco aterotrombótico na obesidade”. O traballo, dirixido polo IP do Centro, Ángel García, foi avaliado por un tribunal con expertos de Galicia, Reino Unido e Murcia.
Esta investigación profundiza nos mecanismos que conectan a obesidade, a hiperreactividade plaquetaria e o risco aterotrombótico. Identifica novas vías para a prevención e o desenvolvemento de estratexias antitrombóticas máis efectivas, abordando a asociación entre a obesidade severa, a inflamación sistémica e a función plaquetaria.
O estudo explora as alteracións no receptor de coláxeno plaquetario GPVI, cuxa expresión aumenta na obesidade, e o seu impacto nos eventos aterotrombóticos. Tamén analiza como a perda de peso tras a cirurxía bariátrica afecta o fenotipo proinflamatorio e protrombótico dos pacientes.
Ademais, a tese identifica novos inhibidores de GPVI con potencial farmacolóxico e examina o papel de PEAR1 na agregación plaquetaria e a súa organización na membrana celular.
O traballo dá continuidade á liña de investigación do grupo sobre o papel das plaquetas na obesidade e eventos aterotrombóticos, con colaboracións co grupo BioFarma do CiMUS na procura de novos inhibidores. A doutora recibiu unha axuda predoctoral da Xunta de Galicia e realizou unha estancia na Universidade de Birmingham.
