Entre os premiados atópase a doutora en Física Mar Capeáns Garrido, científica con gran influencia e cunha longa traxectoria no CERN, o laboratorio de física de partículas máis grande do mundo. Capeáns, que xa é a primeira muller española en ocupar un alto cargo nesta institución como directora de operacións, foi recoñecida polo seu traballo na investigación da orixe do universo e pola súa extensa publicación de artigos científicos.
Outro dos galardóns é para a Fundación Andrea, entidade que ofrece apoio integral a familias con nenos con enfermidades crónicas ou terminais. A fundación, liderada por Charo Barca, proporciona axudas económicas, atención psicolóxica e aloxamentos adaptados preto do Hospital Clínico de Santiago, ademais de humanizar os espazos pediátricos hospitalarios.
No ámbito cultural, a medalla recae no trompetista Esteban Batallán Cons, quen desenvolveu unha notable carreira internacional. Formado en Galicia, foi trompetista principal nas orquestras de Chicago e Hong Kong, e na actualidade imparte docencia na DePaul University de Chicago.
No deporte, o atleta Adrián Ben Montenegro, especializado en carreiras de medio fondo, é outro dos recoñecidos. O deportista de Viveiro acadou o quinto posto nos Xogos Olímpicos de Tokio 2020 nos 800 metros e foi campión de Europa en Pista Cuberta en 2023.
Finalmente, a quinta Medalla Castelao 2026 distíngue a María Barallobre Tomé, propietaria dos restaurantes La Penela. Tras unha carreira docente, abriu establecementos de restauración en Coirós, A Coruña, Madrid, Barcelona e París, destacando pola promoción da gastronomía galega.
A entrega das Medallas Castelao, condecoracións de carácter civil, terá lugar o vindeiro 28 de xuño, coincidindo co aniversario da aprobación do Estatuto de Autonomía de Galicia e do regreso dos restos mortais de Castelao á comunidade.
