O delegado da Xunta en Ourense, Manuel Pardo, acompañado do alcalde, César Fernández, visitou esta mañá o concello de Ribadavia. A localidade é unha das oito da provincia de Ourense que recibiron subvencións da Xunta de Galicia destinadas a fomentar servizos lingüísticos nas entidades locais.
Manuel Pardo destacou que estas axudas, convocadas pola Consellería de Cultura, Lingua e Xuventude, responden ao compromiso do Goberno autonómico coa normalización lingüística a nivel local. Subliñou que as medidas están en liña co Pacto pola Lingua e coa actualización do Plan de normalización da lingua galega.
Na provincia de Ourense, os concellos beneficiarios son O Carballiño, O Barco de Valdeorras, Ourense, Barbadás, Celanova, Ribadavia e a agrupación de Castrelo de Miño e Boborás. No caso de Ribadavia, a achega recibida foi de 2.240 euros.
O delegado explicou que as partidas económicas destinaranse á creación e posta en marcha dun servizo lingüístico. Isto implicará a habilitación dun departamento técnico na entidade local encargado de planificar, xestionar, executar e avaliar medidas e actividades para incrementar o uso do galego en todos os seus ámbitos. Tamén se poderán utilizar para manter servizos xa existentes, reforzando iniciativas e incorporando máis persoal técnico.
A través destes servizos, desenvolveranse proxectos como campañas de dinamización lingüística en formato material (libros, audiolibros, xogos) ou dixital (soportes electrónicos, web, redes sociais). Ademais, impulsarase a formación lingüística con cursos para o propio persoal técnico dos concellos.
