O Consello da Xunta deu hoxe o visto e prace ao proxecto da nova Lei de Administración local de Galicia, que vén a substituír a normativa vixente desde hai case tres décadas. Segundo apuntou o presidente, Rueda, a norma busca “seguir garantindo que os concellos dispoñan dos recursos que necesitan para levar a cabo o exercicio das súas competencias” e adaptar a lexislación “á realidade e aos novos cambios que foron xurdindo nos últimos anos”.
Esta lei pioneira pretende converter Galicia nun referente estatal, dotando ás entidades locais dun marco normativo adaptado ás necesidades sociais, demográficas, tecnolóxicas e organizativas actuais. O obxectivo é “modernizar o marco local galego, simplificar a burocracia e adaptar a norma ao entorno dixital”, ademais de “fomentar a cooperación entre administracións”.
O texto iniciará agora o seu trámite parlamentario tras un amplo proceso participativo que incluíu a análise de arredor de medio milleiro de alegacións. A Xunta tamén mantivo reunións con representantes das deputacións provinciais, da Federación Galega de Municipios e Provincias e de colexios profesionais para recoller achegas.
A nova lei inclúe novidades en materia de modernización, intelixencia artificial e participación cidadá. Estrutúrase nun título preliminar e nove títulos específicos, ademais de varias disposicións adicionais, transitorias e derrogatorias que simplifican o ordenamento xurídico galego, suprimindo cinco leis autonómicas anteriores.
Entre os seus obxectivos destacan a clarificación de competencias, a adaptación da organización municipal á diversidade dos concellos, o reforzo do papel das deputacións, a aposta pola administración dixital e a intelixencia artificial, unha maior participación cidadá e a mellora da capacidade e autonomía financeira das entidades locais.
A lei presta especial atención aos municipios en situación de reto demográfico, establecendo medidas específicas de cooperación entre a Xunta e as deputacións para garantir a prestación de servizos. Tamén se reforza o papel de asistencia das deputacións aos municipios, especialmente aos de menor capacidade económica.
Introducen novas fórmulas de cooperación intermunicipal máis flexibles, como áreas funcionais temporais ou agrupacións de municipios para persoal técnico, co fin de ofrecer máis capacidade a menor custo. Nos municipios de máis de 30.000 habitantes, poderán crearse vicealcaldías e a figura de dirección pública profesional.
No que respecta ao financiamento local, a lei asenta as bases dun novo modelo de participación dos municipios nos tributos autonómicos a través do Fondo de Cooperación Local (FCL). Este fondo incrementa en 20 millóns de euros os fondos incondicionados, que representan case o 89% do total, e establece unha cantidade mínima anual de 100.000 euros por concello.
O novo sistema de financiamento tamén inclúe un fondo para compensar gastos específicos e outro para investimentos en infraestruturas estratéxicas, buscando achegar maior estabilidade, obxectividade e autonomía financeira local.
