O presidente da Xunta, Alfonso Rueda, anunciou hoxe a aprobación do Plan de reforma da atención primaria e comunitaria de Galicia 2026-2030, dotado de máis de 320 millóns de euros. Este plan suporá a creación de 644 novas prazas nos centros de saúde e puntos de atención continuada, co obxectivo de acadar unha atención primaria “máis moderna, con máis servizos e adaptada ás necesidades da medicina de hoxe e do futuro inmediato”.
O conselleiro de Sanidade, Antonio Gómez Caamaño, destacou que o plan se centra en catro grandes ámbitos: estrutura, organización asistencial de axendas, modelo retributivo e medios materiais e infraestruturas. Entre as medidas, resáltase a protección do tempo clínico dos profesionais, a ordenación da sobredemanda, o despregamento do potencial multiprofesional dos equipos, a redución da burocracia e o seguimento continuo da actividade.
No ámbito da organización asistencial, as axendas dos médicos de familia fixaranse en 30 actos por día e as de pediatría en 25, cunha parte flexible xestionada polo propio profesional. Para testar este novo modelo, realizaranse programas piloto en 14 centros de saúde a partir desta semana.
En canto á dotación de recursos humanos, créanse 383 novas prazas en 16 categorías profesionais, que se sumarán ás xa existentes. Destacan 45 prazas de medicina familiar e comunitaria, 18 de médicos de puntos de atención continuada, 47 de enfermería especializada, 45 de matrona e 8 de nutricionista. Incorporaranse tamén 28 prazas de podoloxía e ampliarase a rede de psicoloxía clínica ata os 50 profesionais.
O plan tamén prevé un investimento de 220,6 millóns de euros para a mellora ou construción de novos centros de saúde, 50 millóns de euros para melloras tecnolóxicas e máis de 7,4 millóns de euros para equipamento. A Xunta comprométese a reformar e construír novas infraestruturas en 40 localidades.
No referente ao modelo retributivo, estase a negociar unha modificación para que os profesionais con cupos máis complexos ou carga asistencial exixente reciban maiores complementos, cun investimento inicial estimado de máis de 10 millóns de euros. Valoraranse factores como a complexidade, a idade, a despoboación, a dispersión xeográfica e o illamento.
