A cita, organizada pola asociación O Esquío no Piñeiro en colaboración co Concello de Brión, encheu os montes e aldeas do municipio nunha xornada non competitiva, aínda que puntuable para a Liga Galega de Andainas da Federación Galega de Montañismo e para a Liga Ibérica de Senderismo da Federación Española de Deportes de Montaña y Escalada.

A saída estivo precedida por un minuto de silencio en memoria da nena falecida esta semana na localidade. A continuación, o alcalde de Brión, Pablo Lago, e o presidente da Federación Galega de Montañismo, Alejandro López Sánchez, deron inicio a unha proba con tres distancias a elixir: 16, 33 e 50 quilómetros.

O percorrido partiu do contorno da carballeira de Santa Minia en dirección á aldea de Lamiño e ao balneario do Tremo. Dende alí, o groso dos participantes continuou polas aldeas de O Cabo e O Rial cara a Bastavales, pasando por puntos emblemáticos como Santo Arandel, Ponte Paradela ou o Pazo do Faramello. Os que optaron polo trazado máis longo, de 50 quilómetros, tamén pasaron polas mámoas do monte Rañalonga e as Torres de Altamira.

A organización tamén reforzou o carácter sostible da andaina. O percorrido estivo sinalizado con cintas reutilizables de cor laranxa e frechas rosas pintadas no chan, que foron retiradas tras o paso do último sendeirista. Ademais, por segundo ano consecutivo, cada participante recibiu un vaso reutilizable de PLA na bolsa do sendeirista, eliminando os vasos de plástico nos puntos de avituallamento.

O éxito de participación obrigou a pechar as inscricións cun mes de antelación, a pesar de que o club ampliara en 200 o número de prazas dispoñibles. Nas últimas semanas abriuse incluso un prazo extraordinario para que as persoas que finalmente non puideron acudir renunciasen á súa praza e esta puidera ser ocupada por participantes en lista de espera.