O Consello de Goberno da USC deu o seu visto e prace a este programa, que busca dar resposta á situación xerada a comezos de ano. As bases reguladoras xustifican a creación do programa polas circunstancias excepcionais da convocatoria e o interese estratéxico da USC en reter o talento investigador que manifestou o desexo de desenvolver a súa carreira científica na universidade compostelá.
A vicerreitora de Investigación e Ciencia Aberta, Almudena Hospido, explicou que se trata dun instrumento propio, extraordinario e limitado a esta convocatoria, co obxectivo de recuperar parte dese talento e asumir a responsabilidade institucional. O programa Fénix facilitará a incorporación ou continuidade na USC destas persoas, ofrecéndolles un marco de desenvolvemento profesional e científico comparable ás condicións da axuda RYC 2025 e favorecendo a súa participación en futuras convocatorias.
O programa articula as condicións de incorporación e vinculación do persoal coa USC, a dotación para a súa actividade investigadora e un itinerario cara á súa consolidación. Tamén establece o compromiso do persoal investigador de concorrer a futuras convocatorias competitivas de ámbito autonómico, estatal ou europeo que financien a súa contratación ou actividade.
O programa Fénix é de carácter extraordinario e específico para a convocatoria Ramón y Cajal 2025, e comprende catro prazas: unha na área de Biociencias e Biotecnoloxía (Departamento de Fisioloxía con adscrición CIMUS), dúas na de Biomedicina (Departamento de Fisioloxía e adscrición CIMUS), e unha en Ciencias Físicas (Departamento de Física de Partículas con adscrición IGFAE). A incorporación requirirá, cando proceda, a renuncia da persoa á axuda RYC 2025.
A reitora Rosa Crujeiras anunciou tamén que, tras o proceso de información reservada sobre a convocatoria Ramón y Cajal, tomouse a decisión de intervir de urxencia na operativa e procedementos organizativos da Subárea de Convocatorias e programas de Recursos Humanos para evitar situacións similares no futuro.
