A conselleira de Vivenda e Planificación de Infraestruturas, María M. Allegue, visitou dúas das tres pasarelas de madeira e aceiro que conforman este itinerario de case seis quilómetros. A obra, cun orzamento de 6,8 millóns de euros, cofinanciada con fondos europeos, busca transformar a mobilidade sostible entre Ames e Santiago.
Este novo eixo de mobilidade, que xa está en fase final, arranca en Milladoiro e percorre contornos como Conxo, o Hospital de Conxo, parques urbanos, a zona de Restollal e Pontepedriña, culminando na estación Intermodal. Estímase que o traxecto en bicicleta entre ambos concellos podería durar uns 20 minutos.
As dúas pasarelas visitadas pola conselleira miden 32 metros de lonxitude cada unha e están construídas en madeira de pino, cunha anchura de paso de 4 metros. A terceira pasarela, de aceiro, ten 21 metros de lonxitude. A actuación tamén inclúe melloras na reordenación de rúas, adaptación de zonas de paso, integración con espazos verdes, alumeado público e mobiliario urbano.
Os recentes cortes de tráfico para a instalación das pasarelas e dunha cuneta de seguridade provocaron retencións puntuais en Milladoiro, a pesar de que a maior parte da infraestrutura se atopa no termo municipal de Santiago.
