A recoñecida investigadora impartirá unha clase na universidade e manterá xuntanzas co persoal investigador. L'Huillier, que obtivo o Nobel polos seus métodos experimentais para xerar pulsos de luz de attosegundos, pronunciará a conferencia titulada ‘O mundo dos átomos á escala de tempo do attosegundo’ o 2 de outubro, ás 19.30 horas, no Auditorio ABANCA (Rúa Preguntoiro, 23. Santiago). A charla está aberta a toda a cidadanía.
Anne L'Huillier, nacida en París en 1958, estudou Física na Universidade Pierre e Marie Curie e obtivo o seu doutoramento en 1986. Desenvolveu gran parte da súa carreira na Universidade de Lund (Suecia), onde é profesora de Física Atómica, converténdose nunha figura clave na óptica ultrarrápida e na interacción luz-materia.
O director do programa ConCiencia, Jorge Mira, destaca que a investigación de L'Huillier "transformou a nosa capacidade para observar os procesos máis rápidos da natureza". Os seus traballos permitiron rexistrar o movemento dos electróns, que se produce en escalas de attosegundos (unha milmillonésima dunha milmillonésima de segundo), abrindo o campo da atofísica.
O descubrimento da xeración de harmónicos de alta orde en 1987 sentou as bases para a produción de pulsos de attosegundos. Polas súas contribucións, L'Huillier, xunto con Pierre Agostini e Ferenc Krausz, recibiu o Premio Nobel de Física en 2023.
A capacidade de observar o movemento dos electróns en tempo real abre novas vías para estudar reaccións químicas, a absorción de luz e procesos en semicondutores e sistemas biolóxicos, con potencial para o desenvolvemento de novas tecnoloxías.
Jorge Mira sinala que L'Huillier representa “o exemplo de como a curiosidade por comprender os fenómenos máis elementais pode dar lugar a avances tecnolóxicos revolucionarios”, permitindo explorar o mundo microscópico e comprender mellor os mecanismos fundamentais da materia.
