O director xeral de Familia, Infancia e Dinamización Demográfica, Jacobo Rey, sinalou hoxe que Galicia se sitúa novamente entre as comunidades autónomas con mellores ratios de acollemento familiar a nivel estatal. Esta afirmación realizouna durante a súa comparecencia na Comisión 5ª de Sanidade, Política Social e Emprego do Parlamento de Galicia, onde detallou as iniciativas da Xunta para fortalecer a protección de menores na comunidade.
O Goberno galego impulsou medidas para priorizar o acollemento familiar na protección da infancia e adolescencia. Entre elas, incrementáronse en dúas ocasións as compensacións mensuais para as familias acolledoras nos últimos catro anos e desenvolvéronse diversos programas. Destaca o programa piloto de acollemento familiar especializado con dedicación exclusiva, unha iniciativa pioneira que recibirá máis de tres millóns de euros ata mediados de 2029, dirixida a menores con necesidades específicas.
Como resultado destas accións, Galicia repite como a segunda comunidade con mellor ratio do país, cunha taxa de acollemento do 56%, once puntos por riba da media española. Isto significa que unha maioría de nenos e adolescentes viven nun fogar de acollida, evitando o recurso residencial.
Jacobo Rey tamén precisou que os recursos de acollemento residencial concertados coa Xunta cumpren a normativa vixente, contan con persoal cualificado e son sometidos a inspeccións periódicas. O ano pasado, o Goberno galego destinou 3,6 millóns de euros á mellora destes recursos.
Finalmente, o director xeral anunciou que o Executivo autonómico está a tramitar o anteproxecto de Lei de Infancia e Adolescencia de Galicia, co obxectivo de reforzar o sistema de protección de menores.
