Durante dous días no pasado mes de setembro, a Terapia Ocupacional do Hospital de Día de Psiquiatría do CHUF levou a cabo unha proposta de traballo en rede, desenvolvendo proxectos cocreativos a través da programación con Makey Makey e Scratch, cun enfoque na participación social. Estes traballos foron amosados esta mañá na entrada principal do Hospital Arquitecto Marcide do Complexo.
Dende Terapia Ocupacional consideran que esta exposición "reflicte que a tecnoloxía tamén serve para fomentar a participación e creación conxunta, para intercambiar ideas, e para conseguir facer algo que pensas que non podes facer", explica Nuria García Gonzalo, terapeuta ocupacional da Área e coordinadora do proxecto. Estes proxectos unen técnicas creativas con esta tecnoloxía, "obxectos que a través dunha creación cobran vida", matizan. Son seis proxectos, todos enfocados nos intereses das persoas integrantes de cada grupo de traballo, e relacionados coa música, o deporte ou o cine.
Con esta iniciativa, a Terapia Ocupacional do CHUF colaborou cun grupo de investigación da Universidade da Coruña (UDC) para investigar a factibilidade da aplicación de ferramentas de programación básica na saúde mental. Os talleres cocreativos utilizaron o proxecto Makey Makey, que conecta o mundo dixital co físico, e Scratch, para o desenvolvemento de habilidades mentais mediante a aprendizaxe de programación. Cada grupo deseñou un proxecto creativo diferente, que puxeron en común no Hospital Arquitecto Marcide.
"Era un desafío grande por iso o fixemos en grupo; e cada quen achegou as súas solucións en diferentes momentos do proxecto e segundo as súas habilidades", explicaba Nuria García. O obxectivo era investigar se estas ferramentas se poden aplicar na saúde mental e se un proxecto de tecnoloxía pode crear conexións e vencellos entre as persoas.
Por outra banda, o pasado venres rematou o taller "Hábitos e rutinas para o sono, ocuparnos do descanso é ocuparnos da saúde", organizado dende Terapia Ocupacional da Área. Impartido pola terapeuta ocupacional Lucía Moreda Santamaría, o taller centrouse en como o sono é unha parte fundamental que estrutura a vida cotiá e debe construírse con rutinas diarias. Abordáronse estratexias para organizar o día, reducir a activación e deseñar plans realistas que favorezan o descanso, co fin de "ordenar o día para coidar a noite".
