A xornada comeza ás 10.30 h na sede da SGAE cos Obradoiros de iniciación ao Soundpainting, dirixidos por Eric Chapelle, Johan Sabbe, Angélique Cormier e Xacobe Martínez Antelo. As prazas xa están esgotadas.
Ás 11.45 h, na Casa do Concello, celebrarase unha rolda de prensa para presentar Sabor a Novo. Participarán a concelleira de Capital Cultural e Turismo, Míriam Louzao; a responsable de Eventos do Pazo de San Lourenzo, Tamara Iglesias Rodríguez; e Mónica Mejías, de Correvaidille.
Posteriormente, ás 12.00 h, na mesma Casa do Concello, a alcaldesa de Santiago, Goretti Sanmartín, ofrecerá unha rolda de prensa sobre asuntos de carácter local.
Pola tarde, a alcaldesa Goretti Sanmartín Rei participará na entrega de medallas da categoría Baloncesto dos XVI Xogos do Eixo Atlántico no pavillón de Santa Isabel (13.15 h).
Nese mesmo horario, no pavillón do Restollal, a concelleira de Deportes, Pilar Lueiro, asistirá á entrega de medallas de Voleibol dos mesmos xogos. Mentres, no pavillón da USC, a concelleira de Turismo, Míriam Louzao, participará na entrega de medallas de Balonmán.
O día concluirá ás 19.00 h na Casa das Máquinas co concerto de clausura do II Encontro Internacional Soundpainting Compostela. A Orquestra Galega de Liberación xuntarase con participantes e profesionais desta disciplina nun recital aberto ao público ata completar capacidade. A concelleira de Capital Cultural, Míriam Louzao, asistirá ao evento.
