A conselleira de Medio Ambiente e Cambio Climático, Ángeles Vázquez, destacou hoxe na Cidade da Cultura a publicación dunha guía práctica deseñada para facilitar a análise dos posibles impactos ambientais, sociais e económicos derivados da implantación de proxectos industriais que basean a súa actividade na utilización ou aproveitamento dos recursos naturais da Comunidade.
Esta ferramenta, dispoñible na plataforma GAIA, busca contribuír a axilizar e completar a análise desde o punto de vista ambiental, reforzando á vez a seguridade xurídica. Galicia foi a primeira comunidade en integrar por lei nos procedementos de tramitación medioambiental a valoración expresa dos servizos ecosistémicos que ofrece a natureza.
A guía proporciona un marco de referencia común e homoxéneo para os órganos administrativos responsables de garantir o equilibrio entre a protección do medio natural e o desenvolvemento económico. A súa inclusión é obrigatoria na valoración de proxectos de enerxías renovables, concesións de auga, dereitos mineiros e almacenamento de enerxía.
A responsable autonómica explicou que a guía foi elaborada en base á experiencia adquirida e para facilitar a aplicación práctica da norma, que obriga a prestar especial atención aos servizos ecosistémicos, entendidos como os beneficios que obtén a poboación do bo funcionamento dos ecosistemas.
O obxectivo é que tanto o promotor como os órganos de avaliación identifiquen os servizos ecosistémicos na contorna, describan o seu estado, avalíen os posibles efectos e definan medidas para previr, reducir, corrixir ou compensar os impactos, ademais de identificar accións para a súa conservación e uso sostible.
Con esta iniciativa, Galicia busca axilizar a tramitación completa dos expedientes sen diminuír as garantías ambientais e reforzar a seguridade xurídica, facilitando tamén o traballo dos órganos encargados de emitir informes preceptivos cunha documentación estruturada e homoxénea.
