O Ministerio de Educación, a través dunha carta remitida polo subsecretario Santiago Roura ao conselleiro galego Román Rodríguez, confirmou que sacará a concurso a praza dun docente para a súa cobertura estable e definitiva a partir do curso 2027/28. Esta decisión garante o futuro da materia de Lingua e Literatura Galegas neste centro londinense.
Para o vindeiro curso, 2026/27, a Consellería de Educación da Xunta asumirá a dotación do profesorado de forma transitoria. Este acordo prodúcese tras a negativa inicial do departamento dirixido pola ministra Milagros Tolón a asinar o convenio de colaboración que existía desde hai máis de 30 anos.
O conselleiro Román Rodríguez mantivo varias comunicacións coa ministra Milagros Tolón e co subsecretario Santiago Roura para buscar unha rectificación na postura do Goberno central e asegurar a continuidade destes estudos, considerados fundamentais para a difusión da cultura e do idioma galego no exterior.
A materia de Lingua e Literatura Galegas ofértase como optativa no Instituto Cañada Blanch desde 1992, ano no que unha gran porcentaxe do alumnado tiña orixe galega. O convenio co Ministerio permitiu manter esta oferta educativa durante máis de tres décadas.
