A iniciativa, publicada no Diario Oficial de Galicia, busca premiar propostas que redunden nun mellor servizo á cidadanía e promovan a lectura e o acceso á cultura. O galardón está dirixido a entidades locais galegas con bibliotecas públicas ou axencias de lectura integradas na Rede de Bibliotecas de Galicia.
O certame, que dá continuidade ao Premio de Innovación Bibliotecaria de Galicia, establece dúas categorías segundo a poboación do concello: unha para municipios de ata 10.000 habitantes e outra para os que superen esta cifra. Cada categoría conta cun premio de 3.000€ e un diploma, buscando así favorecer a participación de bibliotecas con recursos máis limitados.
O prazo de presentación de proxectos remata o vindeiro 10 de agosto. As entidades locais poderán presentar ata dous proxectos ou boas prácticas xa executadas. As propostas deben estar relacionadas coa promoción da lectura, a aprendizaxe ao longo da vida, as competencias dixitais, a mellora da accesibilidade, a igualdade, a cohesión social, a innovación e a difusión da cultura galega, especialmente a nivel local.
