O director xeral de Cultura, Anxo M. Lorenzo, presentou hoxe a oitava edición da residencia artística Nortear Ilustrado San Simón, unha iniciativa coa que o Goberno galego busca fortalecer os vencellos culturais con Portugal. O encontro terá lugar na Illa de San Simón entre o 6 e o 9 de outubro, e reunirá a seis artistas de ambas rexións para propiciar un intercambio e coñecemento cultural mutuo.
Na presentación, celebrada na Cidade da Cultura, Lorenzo destacou que esta residencia contribúe á “circulación cultural entre ambas rexións” e á “potenciación e visibilización do talento” no ámbito da ilustración e o deseño gráfico.
Nesta edición, destaca a maioritaria participación feminina, con cinco mulleres entre os seis artistas. Por parte de Galicia participarán Alariko, Emma Ríos e Clara Artiaga, mentres que por Portugal estarán Mar Correia, Cristiana Carvas e Cláudia Martins.
A iniciativa, coordinada polo ilustrador Miguel Robledo, desenvolverase durante catro xornadas baixo a temática de traballo 'A Arquitecturas'. Os participantes crearán cadernos de autor inspirados na illa, que se sumarán á colección xerada en edicións anteriores e que serán expostos nunha mostra.
Ademais, nunha das xornadas, tres grupos de estudantes das Escolas de Arte e Superiores de Deseño Pablo Picasso da Coruña, Antonio Faílde de Ourense e Ramón Falcón de Lugo terán a oportunidade de coñecer a traxectoria dos creadores, participar en obradoiros e debater sobre o sector.
Esta residencia enmárcase no programa de intercambio cultural Nortear entre Galicia e Portugal, promovido pola Consellería de Cultura, Lingua e Xuventude e a Comisión de Coordinación e Desenvolvemento Rexional do Norte (CCDR-N), liderado pola Agrupación Europea de Cooperación Territorial de Galicia–Norte de Portugal (GNPAECT).
