Na concesión destas axudas, que se publicaron hoxe, 16 de novembro de 2026, prestouse especial atención ao apoio a mulleres que emprenden no rural, ás maiores de 55 anos e a aquelas que desenvolven a súa actividade empresarial en sectores tradicionalmente masculinizados. Ademais, o programa Emega inclúe medidas complementarias para favorecer a conciliación da vida persoal, familiar e laboral, e contempla o acceso a servizos específicos de información e asesoramento empresarial.
A convocatoria mantén catro modalidades de axuda. Emega Emerxe, con contías de entre 10.000 e 22.000 euros, apoia novas iniciativas empresariais e a creación de emprego feminino estable. Emega Impulsa, con subvencións de entre 8.000 e 17.000 euros, favorece a reactivación e consolidación de empresas e a implantación de medidas innovadoras.
A terceira modalidade, Emega Innova, achega entre 18.000 e 42.000 euros para iniciativas empresariais con contido científico ou base tecnolóxica. Por último, Emega Concilia é unha axuda complementaria coa que se promove a conciliación, cunha contía de 3.000 euros para as promotoras e de 5.000 euros para as traballadoras por conta allea.
As empresas beneficiarias terán de prazo ata o 27 de novembro para presentar a documentación xustificativa destas axudas, que están cofinanciadas nun 60% pola Unión Europea.




