Os resultados desta investigación, presentados o venres, subliñan a necesidade de reforzar a rede de control de drogas nas augas residuais. Ademais da cocaína, o estudo tamén rexistrou unha presenza significativa de cannabis e un consumo de alcohol notablemente elevado durante as fins de semana.

Na rolda de prensa participaron o conselleiro de Sanidade, Antonio Gómez Caamaño; a conselleira de Medio Ambiente e Cambio Climático, Ángeles Vázquez; e o investigador da área de Química Analítica da USC, José Benito Quintana. A colaboración entre a Xunta e a USC será renovada para consolidar esta rede sentinela, que busca vixiar o consumo de drogas a través das depuradoras.

O obxectivo principal é manter os mesmos puntos de medición para comparar datos anuais e detectar novas substancias, co fin de obter información precisa sobre os patróns de consumo e adaptar as políticas preventivas de saúde pública. A conselleira Ángeles Vázquez destacou o papel das estacións depuradoras (EDAR) como ferramentas clave, lembrando a súa utilidade durante a pandemia da COVID-19 para a detección temperá do virus.

O estudo, froito dun acordo de colaboración asinado en outubro, analizou a presenza de cocaína, cannabis, fentanilo e outras drogas en depuradoras de Santiago de Compostela, Ourense, Pontevedra, Lugo e Tui. Os datos indican que Galicia se sitúa por debaixo da media europea no consumo de MDMA, cannabis e ketamina, aínda que algunhas áreas urbanas alcanzan valores de cocaína próximos á media estatal.

Gómez Caamaño sinalou que a adicción á cocaína representa actualmente o "principal problema" para as unidades de atención ás drogodependencias, agora integradas no Sergas. Engadiu que, grazas aos esforzos de prevención, a última enquisa estatal sobre drogas entre o alumnado de secundaria mostra unha tendencia á baixa no consumo de alcohol e outras drogas en Galicia.