Os populares lembran que, ao comezo do actual mandato, acordouse que as sesións terían lugar cada dous meses, o primeiro luns de cada mes impar, ás 12:00 horas. A portavoz da formación na localidade acusou o alcalde de impedir o labor de control e fiscalización da oposición, atrasando as súas iniciativas e preguntas.
“"Non é a primeira vez que temos que dirixirnos formalmente ao alcalde neste mandato para esixirlle recuperar a normalidade."
Dende o PP insisten en que esta situación vulnera o dereito dos cidadáns a participar nos asuntos públicos a través dos seus representantes e reduce a capacidade dos concelleiros para exercer as súas funcións. A portavoz subliñou que dende a última sesión xa se deberían ter celebrado outras dúas. A formación popular estuda recorrer á Valedora do Pobo se non obteñen resposta á súa solicitude.
Pola súa banda, o alcalde anunciou que ten previsto convocar un pleno a vindeira semana, posiblemente o mércores, para aprobar os orzamentos do ano. Recoñece a situación e matiza que non é do seu agrado, explicando que a situación administrativa é complicada debido á figura do secretario municipal, que traballa en acumulación. Isto significa que o seu posto titular está noutro municipio e acode a Ribas de Sil só un día á semana.
“"Temos que procurar melloralo, porque a min mesmo me gustaría facer o pleno dos orzamentos do ano en decembro e non en abril, pero temos unha situación complicada desde o punto de vista administrativo."
O rexedor subliña que esta circunstancia o obriga a elixir entre a xestión diaria do concello ou convocar plenos sen contido, o que suporía un gasto superfluo. Con todo, asegura que o traballo de fiscalización da oposición non se ve mermado, xa que o seu despacho está sempre aberto para que os concelleiros reciban as explicacións necesarias do día a día. A pesar da situación co secretario, o Goberno local destaca un intenso labor con proxectos e iniciativas, como ser o primeiro concello de Galicia en xestionar unha comunidade de montes.
