A Consellería do Medio Rural informou hoxe da situación dos incendios forestais rexistrados en Galicia, con datos recollidos ata as 08.30 horas. Destacan varios focos activos na provincia da Coruña e un en Lugo.
Na provincia da Coruña, permanece activo un incendio no concello de Laxe, parroquia de Nande, dende as 21.55 horas de onte sábado. As últimas estimacións provisionais sitúan a superficie afectada arredor das 100 hectáreas. Para a súa extinción mobilizáronse 2 técnicos, 13 axentes, 12 brigadas, 12 motobombas, 4 pas e 2 unidades técnicas de apoio.
Outro lume activo atópase no municipio de Vimianzo, parroquia de Salto, dende as 20.16 horas de onte. Afecta unhas 40 hectáreas, segundo as estimacións provisionais. Mobilizáronse 7 axentes, 10 brigadas, 8 motobombas, 1 pa e 1 unidade técnica de apoio.
Na provincia de Lugo, o incendio na parroquia de Soutordei, concello de Ribas de Sil, que comezou ás 18.22 horas de onte sábado, segue activo e afecta unha superficie de 90 hectáreas. Durante a madrugada foi desactivada a Situación 2, que se decretara preventivamente pola súa proximidade ao núcleo de Chenzas. Para a súa extinción mobilizáronse 1 técnico, 15 axentes, 20 brigadas, 15 motobombas, 3 pas, 5 helicópteros e 4 avións.
A Consellería do Medio Rural recorda a importancia de alertar sobre calquera lume forestal chamando ao número gratuíto 085. Tamén está dispoñible a aplicación móbil ALume para avisar sobre incendios activos e un teléfono anónimo (900 815 085) para denunciar actividades delituosas incendiarias. A información actualizada sobre incendios de máis de 20 hectáreas pode consultarse en @incendios085.
