A estación de MeteoGalicia situada en San Clodio, en Ribas de Sil, marcou 42,3 graos ás 16.10 horas. Este rexistro sitúase como a máxima de Galicia nun día marcado polas altas temperaturas. Outras zonas da contorna tamén sufriron valores elevados, como Monforte de Lemos, que chegou aos 40,3 graos.
A capital lucense rozou os 38 graos, mentres que en Sarria superouse esa cifra. Na zona da Terra Chá, concretamente en Cospeito, os termómetros tamén marcaron máis de 38 graos. Incluso zonas costeiras como A Mariña experimentaron un aumento térmico, con 32,2 graos en Burela e algo máis de 26 en Foz.
Ante esta situación, o presidente da Xunta de Galicia fixo un chamamento á prudencia. O mandatario autonómico sinalou que non se descarta declarar a prealerta por seca en determinadas concas e instou á cidadanía a realizar un uso racional da auga, ademais de extremar as precaucións nos colectivos máis vulnerables.
