O director da Axencia Galega das Industrias Culturais, Jacobo Sutil, participou hoxe na presentación da 19ª edición de Culturgal. A feira, que se celebrará do 27 ao 29 de novembro no Pazo da Cultura de Pontevedra, reunirá empresas, profesionais e público xeral ao redor da cultura galega. A Xunta de Galicia achega 90.000€ a esta cita, mantendo o seu apoio como principal entidade colaboradora desde os seus inicios.
A Consellería de Cultura, Lingua e Xuventude consolida así o seu compromiso cun encontro que ofrece ás empresas e profesionais un espazo para presentar o seu traballo, establecer contactos e achegar as súas propostas á cidadanía. A programación de Culturgal, dirixida por Camilo Franco por cuarto ano consecutivo, combinará música e artes escénicas, presentacións de proxectos, proxeccións audiovisuais, encontros profesionais e obradoiros.
A feira incluirá propostas para o público familiar e infantil, así como unha zona de exposición e venda de produtos e servizos culturais. Ademais, a actividade estenderase a Ribeira grazas a Culturgal Expandido, unha iniciativa creada en 2023 para achegar a programación a outros puntos de Galicia nas semanas previas á feira principal.
